Hebrew
בשנת שתים לדריוש המלך בחדש הששי ביום אחד לחדש היה דבר יהוה ביד חגי הנביא אל זרבבל בן שאלתיאל פחת יהודה ואל יהושע בן יהוצדק הכהן הגדול לאמר
Chaggaiחגי
Read continuously through the book. Further passages load as you scroll.
נביאים
פרק 1
Hebrew
כה אמר יהוה צבאות לאמר העם הזה אמרו לא עת בא עת בית יהוה להבנות
Hebrew
ויהי דבר יהוה ביד חגי הנביא לאמר
Hebrew
העת לכם אתם לשבת בבתיכם ספונים והבית הזה חרב
Hebrew
ועתה כה אמר יהוה צבאות שימו לבבכם על דרכיכם
Hebrew
זרעתם הרבה והבא מעט אכול ואין לשבעה שתו ואין לשכרה לבוש ואין לחם לו והמשתכר משתכר אל צרור נקוב
Hebrew
כה אמר יהוה צבאות שימו לבבכם על דרכיכם
Hebrew
עלו ההר והבאתם עץ ובנו הבית וארצה בו ואכבד [ואכבדה] אמר יהוה
Hebrew
פנה אל הרבה והנה למעט והבאתם הבית ונפחתי בו יען מה נאם יהוה צבאות יען ביתי אשר הוא חרב ואתם רצים איש לביתו
Hebrew
על כן עליכם כלאו שמים מטל והארץ כלאה יבולה
Hebrew
ואקרא חרב על הארץ ועל ההרים ועל הדגן ועל התירוש ועל היצהר ועל אשר תוציא האדמה ועל האדם ועל הבהמה ועל כל יגיע כפים
Hebrew
וישמע זרבבל בן שלתיאל ויהושע בן יהוצדק הכהן הגדול וכל שארית העם בקול יהוה אלהיהם ועל דברי חגי הנביא כאשר שלחו יהוה אלהיהם וייראו העם מפני יהוה
Hebrew
ויאמר חגי מלאך יהוה במלאכות יהוה לעם לאמר אני אתכם נאם יהוה
Hebrew
ויער יהוה את רוח זרבבל בן שלתיאל פחת יהודה ואת רוח יהושע בן יהוצדק הכהן הגדול ואת רוח כל שארית העם ויבאו ויעשו מלאכה בבית יהוה צבאות אלהיהם
Hebrew
ביום עשרים וארבעה לחדש בששי בשנת שתים לדריוש המלך
Text Source and Standard
Hebrew, without niqqud or cantillation, preserving the source’s letters and wording.
Hebrew imported from Sefaria: Tanach with Text Only; source edition http://www.tanach.us/Tanach.xml; Public Domain. 2 Perakim and 38 Pesukim. No niqqud or cantillation. Source Ketiv/Qere square-bracket notation retained. Imported 9 October 2026; source locked and publicly readable; HS translations are approved separately.